Savalimmiut aamma Kalaallit Nunaat aalisarneq pillugu isumaqatigiissuteqarput

Savalimmiut aamma Kalaallit Nunaat kingumut ukiormanna aappaagumut aalisarneq pillugu nutaamik isumaqatigiissuteqarput. Københavnimi ullumikkut isumaqatigiinniartoqarneratigut illuatungeriit imartaminni ukiormannatut aalisarsinnaanissartik isumaqatigiissutigaat.
Allattoq Louise M. Kleemann
decembarip 03-at 2008 14:20

Savalimmiormiut aalisariutaat ukiumi nutaami nunatta imartaani 750 tonsinik aalisagartassinneqarput – taakkununnga ilaallutik saarulliit 350 tonsit Tunup imartaani pisarineqartussat. Tamatuma saniatigut Savalimmiormiut aalisariutaat Tunup Avannaata imartaani misileraallutik aalisarnissaminnut 100 tonsinik pisassinneqarput.

Tamatumunnga paarlaallugu kalaallit aalisariutaat Savalimmiut imartaani 4.000 tonsinik ammassassuartassinneqarput. Tamatuma saniatigut kalaallit aalisariutaat ataaseq 2009-mi Savalimmiut imartaani misileraalluni aalisarsinnaassaaq – taamaattorli ullunit 60-init sivisunerunngitsumik.

Savalimmiut aamma Kalaallit Nunaat 1997-imiilli ukiut tamaasa aalisarneq pillugu isumaqatigiissuteqartarput. Isumaqatigiissutit illuatungeriit oqarnerattut nunat taakkua aalisariutaateqarnerminnik ingerlatsiinnarsinnaanerannik kinguneqartartut, aalisakkanillu tunisassiornerannut iluaqutaalluinnartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq