Savalimmiuni uuliasiornialerput
Savalimmiormiut nunarsuarmilu uuliasioqatigiiffiit annerpaat arlallit soqutiginnillutik uuliamik ujarlernermut immikkuullarissumut pissangaqalutik paasisaqarnissaminnut utaqqipput. Aqagu unnukkut uuliasiorluni qillerineq aallartissaaq.
Uuliasioqatigiiffiit assigiinngitsut Statoil siulersortigalugu immami Savalimmiut kujataata kangianiittumi, misiliillutik immap naqqani basaltiusumi uuliasiulerput.
Misiliinerup immikkuullarissutigaa basalti tassaniittoq kinernerummat uuliasiorfiusartunit allanit. Tamanna pillugu naliginnaasumit akisuneruvoq, tamaattumik uuliasioqatigiiffiit arlallit kattullutik misissuinialersaarput.
Norskit qilleriviliaat Stena Don, ullut marluk Torshavnip avataatungaani kisaqqasimariarluni maanna uuliasiorfissamut aallaannaqaaq.
Statoil-illu ilimagaa aqagu pingasunngornermi unnukkut qillerivissamut apuutissasoq. Pilersaarutaavoq ammut 3,8 kilometerinik qillerinissaq.
Qaammatit pingasut qaangiuppata misiliinerup inernerisa piareersimanissaat ilimagineqarpoq.
