Savalimmiuni uuliamik nassaanngitsoorput
Savalimmiut kujataani kangisissumi qaammatit tallimat tuluit uuliasioqatigiiffissuata British Petroleum-ip qillerigaluarnera iluatsitsiviunngitsoortoq nalunaarutigineqarpoq. Naallu uuliasioqatigiiffiit pingasoqqiit BP, Shell Anadarkolu milliardip affaanik nalilimmik qillerisimagaluartik susaavissorsimapput.
Silapiloqattaarnera, immallu naqqata qillernerani piuminaalliornerit ajornartorsiutaasimaqaat.
Uuliasioqatigiiffissuit assigiinngitsut arfinilissaat Savalimmiut imartaani uuliaajunnartumik nassaarfiginngitsuiinnaqaat, naak qanittuani Tuluit Nunaata imartaani uuliamik qalluisorsuugaluit.
Uuliasiorfiilli anusinngoratik aasaru misileeqqinniarput, tamatumuunakkut Italiamiut uuliasiortitseqatigiivat ENI qilleriniarpoq.
Savalimmiuni naalakkersuisut qillerinissanut akuersissutinik agguaaseqqammerput, ukiarulu suli qillerisussarsiortoqaqqissalluni.