Savalimmiuni tunngaviusumik inatsisissaq oqaluuserissavaat

Nutartigaq 10:02

Inatsisinik atortitsinermik ministereqarfik ministeriunermut Lars Løkke Rasmussenimut nassuiaammini 31-nik quppernilimmi ilaatigut inerniliilluni taama allappoq.

Inatsisinik atortitsinermut ministereqarfiup nalilerpaa Savalimmiut Danmarkimik inuulluaqqusisussanngortoq, avissaarluni.

Tunngaviusumik inatsisissatut siunnersuut naalagaaffeqatigiit siuttuisa Skagenimi ullumi ataatsimiinneranni oqaluuserineqassasoq ministeriuneqarfimmit oqaatigineqarpoq. Ataatsimiinnermi Lars Løkke Rasmussen Savalimmiormiut lagmandiannik naalakkersuisullu siulittaasuannik Kuupik Kleistimik qaaqqusisuuvoq.

Ministereqarfiup oqaaseqaataa savalimmiuni lagmandip Kaj Leo Johannesenip tusaatissatut tiguaa.

- Naliliineq taanna iternga tikillugu paasiniartariaqarparput. Ajunnginngilaq. Danmarkimik naalagaaffeqateqaannarnissarput nalornissutaalissanngilaq. Kaj Leo Johannesen DR-imut oqarpoq.

Dansk Folkepartip tunngaviusumik inatsisissatut siunnersuut pillugu isumasioqatigiinnissamut ministeriuneq sapaatip akunnerata tulliani aggersarpaat. Partiip nunanut allanut oqaaseqartartuata Søren Espersenip piumasaraa, Savalimmiormiut tunngaviusumik inatsisissatut siunnersuusiornertik unitsissagaat.

- Ministeriuneq erseqqissaasariaqarpoq. Taanna Savalimmiormiutut oqalussinnaagami, Savalimmiormiut nassuiaassinnaassavai, Søren Espersen Berlingske Tidendemut oqarpoq.

Savalimmiuni Inatsisartuni amerlanerussuteqartut tunngaviusumik inatsisissatut siunnersuut tapersersorpaat, siunnersuummilu paragrafimi siullermi allassimavoq "pissaaneq tamakkerlugu inuiaat Savalimmiormiut tigummivaat".

Tunngaviusumik inatsisissatut siunnersuummi, inatsisit tunngaviusut, kunngeqarneq imaluunniit eqqartuussiviit qullersaat taaneqanngillat, tamannalu pissutigalugu siunnersuut Inatsisinik atortitsinermut ministeeriaqarfiup aamma Dansk Folkepartip itigartippaat.