Savalimmiuni tunngaviusumik inatsiseqalernissaq innuttaasut taasissutigissavaat

Savalimmiormiut namminerisaminnik tunngaviusumik inatsiseqalissanersut taasissutigineqassaaq. Savalimmiormiut lagmandiat Aksel V. Johannesen Lagtingimi sapaatit-akunnerata siuliani ammaanermi oqalugiarnermini taama oqarpoq.

- Inatsimmi tunngaviusumi kinaassuserput aalajangersarneqassaaq, "kinaassuserpullu pillugu allagaat" atorlugu pisinnaatitaaffiuvut pisussaaffivullu tunngaviusut qulakkeerneqassapput.

Aamma atuaruk Naalagaaffeqatigiit: Tunngaviusumik inatsisitaarnissaq oqallisigineqarpoq

Aamma Savalimmiuni pissaanerup inuiannit Savalimmiormiunit pigineqarnera naqissuserneqassaaq, Aksel V. Johannesen, Lagtingip sapaatit-akunnerata siuliani juulip 29-ani inuiattut ullorsiortoqarnerani ataatsimiinnerata ammarneqarnerani taama oqarpoq.

- Inatsit tunngaviusoq ataatsimoorussamik toqqammaviussaaq, ataatsimoorluta naleqartitatsinnik, oqaluttuarisaanitsinnik kulturitsinnillu toqqammaveqassalluni, langmandi taama erseqqissaavoq.

- Inatsimmi tunngaviusumi aamma naalagaaffeqatigiinni tunngaviusumik allannguisoqassatillugu innuttaasut taasitinneqarnerisigut tusaaniarneqarsinnaanissaq qulakkeerneqassaaq, Aksel V.
Johannesen nutaarsiassaqartitsivik Det Færøeske Nyhedsbureau naapertorlugu taama oqarpoq.

2017-imi ukiakkut innuttaasunik taasititsinissaq suli ullulerneqanngilaq.