Naalagaaffeqatigiit: Tunngaviusumik inatsisitaarnissaq oqallisigineqarpoq

Naalagaaffeqatigiit Savalimmiut Kalaallit Nunaat aamma Danmark ullumi ukiumoortumik naapeqatigiipput tassani eqqartorneqarlutik aalisarneq aamma tunngaviusumik inatsisitaarnissaq.
decembarip 14-at 2015 12:23

 

Ataatsimiinnermi pingaarnertut eqqartorneqartut tassaallutik, nunani tamalaani aalisarnermut ingerlatsivinni aqutsinermi, nunani kattuffinnik suleqateqarsinnaaneq aamma tunngaviusumik inatsiseqalernissaq.

Naalagaaffeqatigiit ukiumoortumik ataatsimiinnerat Nunatsinni ukioq manna ingerlanneqartussaagaluartoq, Danmarkimi Savalimmiunilu qinersisoqarnera pissutigalugit tamanna kinguartinneqareersorlu ataatsimeeqatigiinneq Danmarkimi ullumi pivoq.

- Ataatsimeeqatigiinnermi unammilligassat piffissap ingerlanerani pilersartut qanoq iluarsiivigissanerlutigit oqaluuseraarput aamma nunat akornanni suleqatigiinnerput qanoq nukittorsassanerlutigu oqaloqatigiissutigalutigu, Naalakkersuisut siulittaasuat, Kim Kielsen oqarpoq.

Tunngaviusumik inatsit

Nunatta tunngaviusumik inatsiseqalernissaa pillugu pilersaarut ataatsimiinnermi qaqinneqarpoq.

- Namminiilivinnissamik inatsit pillugu, Inatsisartunit Naalakkersuisut peqquneqarput qulaajaaqqullugit. Tamannalu 2016-imi ukiakkut saqqummiunneqassaaq. Tassalu tamanna pillugu naalaggaaffik saqqummiiffigaarput. Tamatumalu kingorna naalagaaffiup isummersuutitik anippaat periarfissallu asasigiinngitsut taakkartorlugit. Naalagaaffilli ilisimatinneqarpoq, Inatsisartut taakkuummata tamanna pillugu aalajangiisussaasut, Naalakkersuisut siulittaasuat, Kim Kielsen oqarpoq.

Nunattalu tunngaviusumik inatsiseqalernissaamik pilersaarutaa, ministeriunerup, Lars Løkke Rasmussenip oqaaseqarfigaa oqarluni tamanna ammaffigalugu.

- Taanna oqarpoq, apeqqutaaasoq tamanna siunnerfik sumut ingerlanniarneqarnersoq. Taamatut oqareersoq Lars Løkke Rasmussenimut ersarissaatigaara, Inatisartunut ilaasortat 70 procentiisa missaanniittut namminiilivinnissamik inatsisitaarnissap tunaartarineqarnissaa piumasarigaat, Naalakkersuisut siulittaasuat oqarpoq.

Aalisarneq

Naalagaaffeqatigiit iluani aalisarneq pillugu nanat tamarmik immikkut politikkeqarput, tamannalu qaangerniarlugu nunat pingasuusut atorfilittaasa tamanna qulaahassavaat qanoq iliornikkut tamanna pitsaanerusumik anguneqarsinnaanersoq.

- Nunatsinnit oqariartuutigaarput, tamanna pillugu atorfilittagut qulaajaassasut pitsanngorsaatissanik ujartuillutik. Aamma siunnersuutigalutigu atorfilittat oqarasuaatikkut ataatsimiittarunnaarlutik imminnut tikillutik aalisarnermut tunngasut pillugit ataatsimiittalernissaat. Taamaalillutik aalisarneq pillugu eqqartueqatigiittarnissaat piumasaraarput.

Naalakkersuisut siulittaasuat, Kim Kielsen taama oqarpoq.