Savalimmiuni qinnuteqarnianngillat

Danmarkip Savalimmiunut ukiumut ataatsimoortumik tapiissutigisartagaani akit qaffakkiartornerannut aaqqiissutissaannik qinnuteqarniaratik, Savalimmiuni partiit naalakkersuisuutitaqartut isumaqatigiissutigisimavaat.

Taamaalilluni Savalimmiunut ataatsimoortumik tapiissutit ukiut siuliinisut allannguuteqaratik – ukiumut 615,5 millioni kouuniuinnassapput.

Partiini naalakkersuisoqatigiinni Danmarkimiit ukiumoortumik tapiissutit akit qaffakkiartornerannut malinnaatinneqarnissaannik piumasartik Sambandspartiikkormiut taamaalillutik taamaatiinnarpaat, Samabndsparti tassaavoq parti Danmarkimut qanittumik atassiteqarnissamik kissaateqartoq.

Partiit naalakkersuisooqataasut, Socialdemokratit, aamma Folkeflokkenikkut Savalimmiut aningaasatigut nammineerlutik ingerlatsisinnaalernissaat sulissutigaat, taamaattumillu isumaqarlutik, akit qaffakkiartornerannut aaqqiissutissat ilaatinneqartariaqanngitsut.

Savalimmiuni inatsisartunut 2008-mi qinersisoqartussaavoq. Taamaattumik massakkut naalakkersuisooqatigiit, ukioq qinersiviusoq qaangerlugu ataatsimoortumik tapiissutinut tunngasunik isumaqatigiissuteqarusunngillat.

Tassa Savalimmiormiut kissaatigaat, ataatsimoortumik tapiissutit 2008-p tungaanut 615,5 millioni koruuniussasut.