Savalimmiuni qinersinerup inernissaa pissangassutigineqartoq
Aningaasaqarneq pitsaagaluartoq qinigassanngortittunut oqallitsitsinerni oqallisigineqartorujussuusarpoq.
- Suliffissaaleqisoqanngilaq aalisagarpassuaqarluni. Aningaasalli qanoq atorneqassappat? Tamanna qineqqusaarnermi assortuussutigineqartupilussuuvoq, Savalimmiuni naalakkersuinermik ingerlatsinermut malinnaasoq, Árni Gregersen oqarpoq.
Aamma nukissiuutit mingutsitsinngitsut, inissaaleqineq takornariallu pillugit politikkikkut najoqqutassat savalimmiuni politikerit oqallisigisarpaat.
Inuit isumaannik misissuinerit naapertorlugit illuatungiliuttut amerlanerussuteqartussaarpasimmata qinersinerup inernissaa pissangassutigineqarpoq.
Gallupip inuit isumaannik misissuinera naapertorlugu maanna naalakkersuisoqatigiinneersut lagmandimit socialdemokraatiskiusumit Aksel V. Johannesemit siuttuuffigineqartuneersut marlunnik ikinnerusunik qinigaatitaqartussaarpasipput, taamaattoqassappallu Lagtingimut ilaasortani katillugit 33-usuni 15-inik qinigaatitaqassallutik.
Inuillu isumaannik misissuinerit naapertorlugit illuatungiliuttuniit partiinit sisamaasunit, Folkeflokkenimit, Sambandspartiimit, Selvstyrepartiimit Midterpartiimiillu qinigaasut 18-iusussaarpasipput.
Taaguussinerit kisinneqarnerata unnugu nunatsinni nalunaaqutaq arfineq pingasunut naammassisimanissaa ilimagineqarpoq.