Savalimmiuni qineqqusaarnermi takornariartitsisarneq avissaartuussutaasoq

Oqaasinnaarli takornariartartunut pingaartumik Danmarkimeersunut amerliartortunut akimmisaartitsivoq.

Savalimmiuni qineqqussaartoqaleruttorpoq - takornariallu amerliartortut qineqqusaarnermi oqallisigineqartupilussuupput.

Savalimmiuni nutaarsiassaqartitsivik Det Færøske Nyhedsbureau taama allaaserisaqarpoq.

Savalimmiuni 51.000-it sinnilaarlugit innuttaqarpoq, Savalimmiunilu nutaarsiassaqartitsivik naapertorlugu takornariarpassuit siorna 110.000-it takornariarsimapput.

Takornariartartuni qallunaat sisamararterutaat takornariartartut, takornariat pillugit kattuffimmi, Visit Faroe Islandsimi, ussassaarinermut pisortaq, Súsanna Sørensen naliliivoq.

Politikikkullu aaqqiissuteqartoqarnissaanik ujartuivoq.

- Takornariat amerlanerit pinngortitamut takornariartarput, aammali nunaatillit isertitaqartannginnertik annerusumik isoraat, tamatumalu kingunerisaanik nunaatillit pinngortami takornariartartunut akiliisitsisalersimallutik.

Ataqatigiissaakkamik ilusilersukkamillu aaqqiisoqarnissaa amigaatigineqarpoq, takornariarfiusinnaasullu pillugit tuniniaaniartarneq ajornartorsiutaasarpoq - akit ilisimaneqanngimmata, Súsanna Sørensen oqarpoq.

Aaqqiissuteqarsinnaanerli ajornarsinnaasoq, Savalimmiuni universitetimi Ph.d-usoq adjunktilu, Hallbera West isumaqarpoq. Takornariartitsisarnerlu Savalimmiunut pingaaruteqarmat aaqqiisuteqartoqarnissaa suliffissanillu pilersitsisoqarnissaanut tamanna pingaaruteqartoq taassuma ilanngullugu oqaatigaa.

Savalimmiuni apriilimi sapaatit akunnerisa naaneranni takornariaqarneq matoqqatinneqarpoq, takornariarfigineqarnerpaajusut takornarianit innarlerneqarsimasut aaqqiissuteqarfiginiarlugit. Pisuffiusinnaasullu nutaat nalunaaqutsiinerillu suliarineqarsimallutik.