Savalimmiuni namminiilivinnissaq pillugu assortuunneq aallarteqqilerunarpoq

Savalimmiut namminiilivinnissaat pillugu assortuuttuarneq aallarteqqilerunarpoq.

Savalimmiut Danmarkimit avissaarnissaat naalakkersuisunut illuatungiliuttut, Republikanerit, Inatsisartuni siunnersuutigeqqammerpaat.

Siunnersuut naapertorlugu, nunanut allanut tunngassuteqartut, aamma naalagaaffiup isumannaatsuunissaanik illersornissamullu politikki, Savalimmiut namminneq akisussaaffigissavaat. Tassunga atatillugu Savalimmiut Naalagaaffinnut Peqatigiinnut nalunaarutigissavaat, Savalimmiut tassaasoq nuna nammineq aalajangiinissamut pisinnaatitaasoq, soorlu nunarsuatsinni allani taamaattoq.

Savalimmiuni nunanut allanut illersornissamullu politikki, Kalaallit Nunaannisuulli, Danmarkimut atasuupput. Folketingilli akuersineratigut nunanut allanut tunngassuteqartunut Savalimmiut pisinnaatitaaffeqarneruleqqammerput.

Republikanerit isumaqarput, Savalimmiut nunarsuaq tamakkerlugu piumasaqaatinut malinnaalluartut, taamaammallu namminneq isumaqatigiissusiorsinnaassuseqarlutillu soqutigisaminnik qanoq ilisukkulluunniit ingerlatsisinnaallutik.

Siunnersuumminni Republikanerit aamma ilannguppaat, Savalimmiuni nunanut allanut ministereqarfiliornissaaq pisariaqassasoq, nunanut allanut ministerimik toqqaanissaaq taamatut aamma. Aallartitaqarfinnik nunani allani Savalimmiut ammaanissaat pisariaqalissasoq aamma oqaatigineqarpoq.