Savalimmiuni naalakkersuisoqatigiit uparuartorneqangaatsiarput

Savalimmiuni naalakkersuisoqatigiit sakkortuumik uparuartorneqalerput. Allaat Ruslandimi pissutsinik eqqussisimasutut taagorneqalerlutik.

Eqqissiviilliuutaalersoq tassaavoq lagtingimut qinersinissamut atatillugu kinguartitsineq.

Savalimmiuni inatsisartut ukiuni sisamanngulersuni atuunnerminni inatsisiliassarpassuit, naalakkersuisoqatigiiliornermi anguniagassatut atsioqatigiissutigisat naammassiniarlugit ulluni makkunani unnuaarullutik sullipput.

Inatsisit 100-t missaanniittut juullertinnagu naammassiniagassaraat, taakkulu koruuninik 1 milliardinik aningaasartuutinik naleqarput.

Naalakkersuisoqatigiillu maanna nalunaarutigaat inatsisartunut qinersinissaq tulleq sapaatip-akunneri sisamat sioqqullugit nalunaaruteqarumaartoq. Ileqqut naapertorlugit qinersisoqarnissaa sapaatip-akunneri arfinillit sioqqullugit nalunaarutigineqartaraluarpoq.

Naalakkersuisoqatigiit nalunaarutaat Savalimmiuni assortuussutaalerpoq.

- Inuiaat pisinnaatitaaffiannik aalajangerneq sakkortuumik unioqqutitsineruvoq, inuiaqatigiilerinermik ilisimasalik Jóannes N. Dalsgaard oqarpoq.

- Tamat oqartussaaqataanerannik sumiginnaalluni aalajangiinerit nunani Ruslandikkutut ittuni taamaallaat siumorneqarsinnaasarput, taamaammat naalakkersuisut namminneq qineqqusaarnermik nalaanni pissusiusunik allanngortitsinerat unioqqutitsinertut taasariaqarpoq, Dalsgaard nassuiaavoq, oqarluni qinersinermut atatillugu allannguisoqassappat lagtingimut qinersinerup tulliup kingorna aatsaat allannguutit atuutilersinneqarsimassagaluartut.

Høgni Hoydal, illuatungiliuttunit Republikanerineersoq oqarpoq, naalakkersuisoqatigiit nunartik kisermaassilluni naalakkersuisoqarfittut inissikkaat.

Illuatungiliuttut aamma assut kusanaagaat naalakkersuisoqatigiit aningaasartuutissarpassuit ukiuni qulini tullerni atuuttussat maanna akuerineqarnerat, inatsisartummi tulliit taakku allannguuteqarfigisinnaassanngimmatigit.

Savalimmiunili lagmandi Jóannes Eidesgaard Naalakkersuisut siulittaasuattut oqarpoq, pissutsinik allannguinerit nunamik ingerlatsinermut ajortumik kinguneqassangatinngivillugit.

- Inatsisartuni amerlanerussutillit aalajangiipput, taakkulu aalajangerpaat qinersinermut inatsisip allanngortinnissaa, allamik naamik, Eidesgaard oqarpoq.

Savalimmiuni naalakkersuisoqatigiit tassaapput Socialdemokratiet, Folkeflokken aamma Sambandspartiet. Taakku Inatsisartuni issiaviit 32-it ilaat 21-t issiavigaat. Savalimmiuni inatsisartunut qinersinissaq kingusinnerpaamik januaarip 19-iani pissaaq.