Savalimmiuni naalakkersuisoqatigiit avissaartuutilerput

Savalimmiut inatsisartuini amerlanerussuteqartut aalajangeqqammerpaat Savalimmiut qinersivittut ataasiinngortinneqassasoq. Savalimmiuni arfineq-marlunnik massakkut qinersiveqarpoq. Qinersiviup ataasiinnanngortinneqarnera inatsisartut inuttalersorneqarnerannik malunnartumik allanngortitsissanerarneqarpoq.

Naalakkersuisoqatigiit Socialdemokratineersut, Folkeflokkenimeersut Sambandspartiimeersullu qinersinermut inatsisissaq aappassaaneerneqarmat maluginngitsoorneqarsinnaanngitsumik avissaartuupput, taamaattumik ilimagineqalerpoq naalakkersuisut siulittaasuat Joannes Eidesgaard qinersinissamik sivitsunngitsoq nalunaaruteqartariaqassasoq.

Savalimmiut qinersivittut ataasiinnanngortinneqarpat inatsisartuni ilaasortat qeqertaneersut kinguneranik ikilisussaapput akerliusullu naliliipput qinersinermut inatsit allanngortinneqarpat avinngarusimasuniittut ineriartornermi katataajartulissasut.