Savalimmiuni naalakkersuinikkut ajornartorsiortoqalerpoq

Socialdemokratit sinnerlugit inatsisartuni ilaasortap Gerhard Lognbergip partiinut naalakkersuisoqatigiittunut ilaasortaajunnaarnerminik nalunaarutaa tupaallaatigineqaqaaq.

Savalimmiuni naalakkersuisoqatigiit inatsisartuni ilaasortaatitaat maanna 16-iinnanngorput, inatsisartunilu ilaasortat katillugit 33-upput.

Partiit naalakkersuisuutitaqartut tassaapput Socialdemokratit, Republikanerit kiisalu Centerpartiet.

Savalimmiuni inatsisartunut januaarimi qinersisoqarmalli immap naqqatigut sulluliaq Strømømiit Sandømukartoq pillugu isumaqatigiinngittoqarpoq. Sulluliaq 700 miliuunit koruunit missaannik akeqartussaq sananeqassappat taanna nunarsuarmi takinerpaanngussaaq.

Inatsisartunut qinersinissaq sioqqullugu sulluliaq pillugu taamani inatsisartuusuni taasisoqarmat, amerlanerussuteqartut sulluliap sananeqarnissaanik tapersersuipput.

Sulluliaq sananeqassappat Savalimmiuni aatsaat taama annertutigisumik sanaartortoqassaaq.