Savalimmiuni Lagmandip Lagtingimut ammaanersiornermi oqalugiaammini qinersisoqarnissaa nalunaarutigaa
Savalimmiuni Lagmandip Aksel V. Johannesenip Lagtingimut ammaanersiornermi aggustip 31-anni qinersisoqartussanngortoq nalunaarutigaa.
Taamaalilluni naalakkersuisuugallartut tullianut qinersisoqarnissaanut issiaannassapput, aggustip 31-a tassaammat qinersinissamut killigititaasoq.
Aksel V. Johannesen partiimut socialdemokratiimut siulittaasuuvoq, savalimmiormiutut Javnaðarflokkurin-imik taaneqartartumut.
Naalakkersuisunut siulittaasunngorpoq septemberip aallaqqaataani 2015-imi qinersinerup kingornatigut. Savalimmiuni politikerinit nuannarineqarnerpaanngorpoq qinersinermi 2405-init taaneqarluni.
- Savalimmiuni naalakkersuisut siulittaasuattut inissisimasimaninnut ataqqinaataasumut qujajumavunga. Suleqatigisimasannut illua’tungiliuttunullu suleqatigiilluarsimanitsinnut aamma qujajumavunga. Ilaatigut assoralisimaarnartarsimaqaaq, Aksel V. Johansen oqalugiarnermini oqarpoq.
- Ataqqinarpaluttumik pitsaasumillu qineqqusaarnissaq qinnutigissavara, oqarpoq.