Savalimmiuni kommuni Qaasuitsup Kommunianut 200.000 koruunik tunissuteqartoq

Runavikar Kommune Uummannaq ukiuni qulikkuutaani arlalinni illoqarfittut ikinngutigisimavaa, Nuugaatsiamilu tassaarsuaqarneranik tusagaq quarsaarnartuusoq, Runavikimi borgmesteri Tórbjørn Jacobsen Qaasuitsup Kommuniani borgmesterimut Ole Dorphimit nalunaaruteqarluni taama allappoq.

- Atlantikup avannaamiuusugut pinngortitaq qanittuaraallugu inuuvugut, taamaattumillu aamma ilaatigut pinngortitap nukissuinik eqqugaasinnaasarpugut, Torbjørn Jacobsen taama allappoq.

- Inuunermulli pisariaqartitat peerutivissornerini, soorlu Nuugaatsiami taama pisoqartoq, ataqatigiinnissaq pisariaqarpoq sapinngisarlu tamaat ikiuisoqartariaqarluni, borgmesteri kommunalbestyrelsi sinnerlugu taama allappoq nangillunilu.

- Taamaammat Nuugaatsiap sanaqqinneqarnissaa tapersersorniarlugu 200.000 koruuninik tunissuteqarniarluta tamatta isumaqatigiilluta aalajangerpugut, aningaasallu taakku Runavikar Kommunimit assammik isaassinertut isigineqassapput, borgmester Torbjørn Jacobsenip Ole Dorphimut allakkani taama naggaserpai.

Runavikar Kommune Eysturoyip qeqertaaniippoq 3.800-llu missaannik innuttaasoqarluni.