Savalimmiuni kikkulluunniit aalisarunnaarallassapput
Savalimmiuni nerisannaarineqartoq, tassalu nammineq aalisakkamik kangerlunni ikerniluunniit pisamik unnukkorsiorneq ajornarsilerunarpoq.
Tassami Savalimmiuni aalisarnermik siunnersuisoqatigiit eqqarsaatigilerpaat sinerissap qaanittuani 1 sømil tikillugu avasitsigisumi aalisarneq ukiuni tullerni marlunni matugallarneqassasoq.
Taama siunnersuisut aalajangerniarnerat Savalimmiuni imartat saarulleerutingajassimanerannik pissuteqarpoq.
Innuttaasut sinerissap qanittuani aalisarsinnaanermik mattunneqarnissartik assut mamiatsaatigaat, amerlaqisummi umiatsiannguaminnik aallalaarlutik aalisarneq pinngitsoorsinnaanngilaat.
Taamaakkaluartoq aalisarnermik siunnersuisoqatigiit manngertitaarput.
-Allatut ajornaqaaq, aalisagaqassuseq ilorraap tungaanut saateqqissagutsigu aalisarnermik killilersuisariaqarpugut, oqarput.
- Savalimmiut kitaata-kujataani imartami ”Føroya Bank”-imik taagukkami aalisarnermik ukiuni marlunni unitsitsigallarnissaq pingaaruteqartorujussuuvoq.
Siunnersuisoqatigiit taama siunnersuuteqarnermikkut illersorpaat, Nunat tamat imaani ilisimatusarnermut siunnersuisoqatigiit aamma Savalimmiuni aalisarnermik misissuisartoqatigiit killilersuisariaqarnermik inassuteqaataat.
