Savalimmiuni inatsisartunut qinersisoqassanngilaq
Savalimmiuni naalakkersuisut ippassaq ualikkut ajornartorsiorluinnaleraluartut Savalimmiuni inatsisartunut qinersisoqassanngilaq.
Savalimmiuni naalakkersuisut siulittaasuata socialdemokratiusup – Jóannes Eidesgaardip –Savalimmiuni pissutsinut naalakkersuisoq naalakkersuisoqatiminnit Folkeflokkenimeersoq Jacob Vestergaard ippassaq soraarsippaa. Taama pisoqarnera Folkeflokkenimi ajornartorsiulernermi ataatsimiittariaqalernermik kinguneqarpoq, partiilli siulittaasua Jørgen Niclasen ippassaq unnukkut nalunaarpoq, naalakkersuisoqatigiinni suleqataaginnarniarlutik.
Savalimmiuni naalakkersuisoqatigiit partiit pingasuupput tassaasut Socialdemokratit, Folkeflokken aamma Sambandspartiet. Naalakkersuisoqatigiit ukiut sisamangajaat naalakkersuisuupput kingusinnerpaamillu januaarip 18-anni qinersisoqassalluni. Savalimmiuni naalakkersuinikkut pissutsit qinersinissamut sunniuteqassapput, Jacob Vestergaardillu ippassaq soraarsitaanera qinersisoqarnissaanik ilimasutsitsileraluarpoq.
Naalakkersuisut siulittaasuata Jóannes Eidesgaardip Jacob Vestergaard Savalimmiuni pissutsinut aamma angallannermut naalakkersuisutut soraarsippaa, Savalimmiuni angalatitseqatigiiffimmut pisortanit pigineqartumut Strandferdsland-imut akuliussimammat.
