Savalimmiuni ikuallarujussuartoqarmat amerlasuut qimagussuunneqarput
12:05 nutarterneqarpoq.
Qeqertami kujasissumiittumi Suðuroymi illoqarfimmi Tvøroyrimi suliffissuaq ikuallappoq. Kringvarpimilu tusagassiortoq naapertorlugu qanoq ikuallalersimanersoq suli nalunarpoq.
- Suliffissuarmi ammoniakkimit pujorujussualerpoq, taamaammallu inuit qimagussuunnissaat ukkatarineqarpoq, Rógvi Olavson oqarpoq.
Aalisakkanik suliffissuup eqqaani atuarfeqarlunilu napparsimmaveqarmat, inuit arlallit qimagussuunneqarput.
- Inuilli napparsimmavimmiittut qimagussuunneqanngillat. Taakku napparsimmaviup iluani isumannaatsumut nuunneqarput. Meeqqalli sumiiffimmilu najugaqartut allat sumiiffiup navianarnera pissutigalugu allamukartinneqarput, tusagassiortoq oqarpoq.
Tamatuma saniatigut Savalimmiuni politiit ikuallattup eqqaanukartoqannginnissaa kaammattuutigaat.
Ikuallanneq Savalimmiuni ullaakkut nalunaaqutaq qulinut nalunaarutigineqaqqaarpoq.
Umiarsuaq qatsereqataasoq
Savalimmiut sinerissami alapernaarsuisuisa umiarsuaataat qatserinermut peqataavoq, qatserinermullu iluaqutaalluarluni.
- Umiarsuaq takkummat, taava qatserisartoqarfimmeersut nunamukaqqipput. Suliffissuup eqqaaniinnissaq navianarpallaalersimammat, qatserisartoqarfimmeersut qatseriniarnerminnik akunnerni marlussunni unitsitsigallarsimagaluarput, Rogvi Olavson oqarpoq.
Suliffiit annaaneqartut
Suliffissuaq Suðuroymut iluatsittumik oqaluttuaagaluarpoq. Illoqarfimmimi suliffissaaleqiffiugaluartumi suliffinnik 200-nik pilersitsigaluarpoq.
Siunissarlu maanna nalunarsivoq.
- Aalisakkanik suliffissuaq nutaaliaalluinnartoq maanna ikuallappoq. Taamaammat suliffippassuit annaaneqarnissaat maanna naatsorsuutigineqalerpoq, Savalimmiuni nutaarsiassaqartitsivimmi Kringvarpimi tusagassiortoq, Rógvi Olavson oqarpoq.