Savalimmiuni eqqumiitsuliortunut akissarsiaqartitsineq eqqunneqartoq

Nutaamik nalunaaruteqalerneratigut eqqumiitsuliortutut akissarsiat eqqunneqarput, taakkulu eqqumiitsuliortunut pingasunut ukiunut pingasunut atuuttussamik tunniunneqartalissapput. Assilialiorlutik eqqumiitsuliortut kattuffiat nittartakkamini taama allappoq.  

Aaqqissuussineq 1 millionit koruunit missaannik aningaasartaqarpoq, Savalimmiunilu namminersorlutik oqartussat siunertamut immikkut aningaasaliissuteqarput.

Taamatullu aalajangertoqarnera tupaallannanngitsumik Savalimmiuni eqqumiitsuliortut akornanni nuannaarutigineqarpoq.

- Eqqumiitsuliortut suliaasa pingaartutut aningaasanillu akiliuteqarfigineqartussatut politikerinit akuerineqarnerat isumaliortaatsikkut siuariarneruvoq annertooq, Marita S. Dalsgaard Savalimmiuni Eqqumiitsuliornermut Siunnersuisoqatigiinni siuttuusoq taama oqarpoq.