Savalimmiuni Centerparti akerliuvoq

Savalimmiuni arnat arnaqatiminnut angutillu anguteqatiminnut katittarnissaat imaluunniit meerarsiartaartarnissaat naalakkersuisoqatigiinnut ilaasup, Centerparti-p, akueriumanngilaa.

Taamaammat Centerpartiip naalakkersuisooqatigiit Socialdemokratit Kunngiitsuunermillu tapersersuisut, tassa Republikanerit, kaammattorpai, arnaannaasartut angutaannaasartullu pisinnaatitaaffii pillugit inatsisissamik siunnersuusiorniarneq utaqqiseqqaalaassagaat.

-Akunnitsinni taama isumaqatigiinnikuuvugut, pisinnaatitaaffiillu pillugit illuatungiuttut akuersaassagaluarpata, illuatungiliuttut tunuartariaqassapput, Centerpartiimi siulittaasoq, Jenis av Rana, Savalimmiuni Radiomut oqarpoq.

Arnaannaasartut angutaannaasartullu pisinnaatitaaffiisa pitsanngorsarneqarnissaat naalakkersuisoqatigiinnut ilaasortat akuersaassagaluarpassuk, Naalakkersuisut avissaartuutissasut Socialdemokratit uppernarsarpaat. Partiip oqaaseqartartua, John Johannesen, savalimmiormiut Radioannut oqarpoq, isumaqatigiissut partiip lagtingimut ilaasortaatitaasa akuersaareeraat, akuersissutigineqartussammi pingaarutillit suli amerlaqimmata.

Kunngiitsuunermilli illersuisut ilaata, Finnur Helmsdalip, isumaqatigiissut malinnianngiaa. Savalimmiuni tusagassiofinnut arlalinnut taanna oqarpoq, arnat arnaqatiminnut angutillu anguteqatiminnut katissinnaanissaat Lagtingimi uani qinersivimmi siunnersuutigineqassagaluarpat nammineq tapersiilluni taaseqataajumaarluni.