Savalimmiuni aningaaserivik Eik Banki ajornartoorpoq
Savalimmiormiut aningaaseriviisa annersaat, Eik Bank, Savalimmiuni qullersaqarfeqartoq, aningaasatigut ajornartorsiorpoq. 1990-ikkunni aningaasarliornermik Savalimmiut Naalakkersuisui eqqaaseqqinneqarpullusooq.
- Eik Bankip Savalimmiormiunit isigineqarnera, Danmarkimi Danske Bank-ip aamma Nordea Bank-ip danskinit isigineqarnerat assersuutissaqqippoq, taamaattumilluuna nunatta aningaasaqarniarnerata ajornartorsiornera ukkatarigipput, Savalimmiuni aningaasaqarnermut Naalakkersuisoq, Jóannes Eidesgaard oqarpoq.
Aningaaseriviup ajornartorsiornera pillugu Eik Bankip siulersuisuini siulittaasoq, Odd Bjellvåg ima oqarpoq:
- Maanna utaqqiinnarpugut, aningaaseriviup annaanneqarnissaanut susoqassanersoq qanorlu iliornissarput nalugatsigu, Aningaasanik nakkutilliisut piumasaqaataat suli ilisimannginnatsigit, Odd Bjellvåg oqarpoq.
Eik Bankip ajornartorsiulerneranut pissutaasorineqarpoq, Danmarkimi illorsuarnik, iluanaarniarneq aallaavigalugu pisiortornerup kinguneranik aningaasarliulerneq.
Illorsuit pisiarisimasat akikillinissaat Aningaasaqarnermut nakkutilliisut piumasaqaatigissagaat ilimanarpoq, aammalu piumasaqaatinut ilaassagunarpoq, bankip ajunaarutaasinnaanngitsunik aningaasaliisalernissaa. Taamaattoqassappallu banki ikiorserneqartariaqarpoq. Aningaasanik qassinik ikorserneqarnissaa suli ilisimaneqanngilaq.
Savalimmiuni suliffeqarfiit annersaat, TF-Holding, sillimmasiisarfimmik piginnittoq, 400 million koruuninik ikiorsiiniarluni nalunaareerpoq. Taamaaliussagunilli piumasaraat Eik Bankip Danmarkimi immikkoortortaqarfitsit allanut tunissagaat.
Taannatuaagunarporlu annaassiniarnermi periusissatuaq.
Taamaatoqassappallu Danmarkimi aningaaserivimmiittuutillit 100.000-it eqqorneqartussaassapput. Aningaasaatiminnilli annaasaqassanngitsut Aningaasanut nakkutilliisut qulakkeereerpaat, Naalagaaffiup, tassalu Dnamarkip naalagaaffiata qularnaveeqqusiineratigut.
