Savalimmiuni akit qaffakkiartornerpaapput
Nunani Avannarlerni pisiassat akiinik sanilliussinermi, Savalimmiuni naatsorsueqqissaartarfiup suliarisaani takuneqarsinnaavoq, Savalimmiuni akit ullumikkut siornamut naleqqiullugit 3,4 procentimik qaffariarsimasut.
Piffissami tamatumani Danmarkimi qaffariaat 1,1 procentiuvoq Norgimilu 0,4 procentiulluni. Islandimi akit qaffariaataat Savalimmiunisut qaffasitsigaaq.
Savalimmiuni illumik pisineq attartornerluunniit ingammik qaffariaateqarfiusimapput. Savalimmiuni illumut aningaasartuutit siornamut naleqqiullugit 11,2 procentimik qaffariarsimapput. Danmarkimi illut 1,8 procentiinnarmik qaffariarsimapput, Norgimili illut akii 2,4 procentimik appariarsimallutik.
Savalimmiuni inuussutissat aamma imigassat siornamiit akisunerulersimapput.
Nunatsinni naatsorsueqqissaartarfiup kisitsisaatai naapertorlugit 2006-imi juulimiit 2007-imi juulimut akit 2,1 procentimik qaffariarsimapput.