Savalimmiuni aalisartut iluanaarutaasumik pisaqamapput

Savalimmiormiut aalisariutaataat Savalimmiut avammut tunisaqarnerannut pilersuilluarsimasutut aningaasaqarnikkullu isertitsilluarsimasutut unnersiutigineqarput.

Aalisariutit kilisaatillu pisaqamasimangaaramik ukioq 2006-imi pisaqamanerpaatut rekordiliiffigisimagaat, nutaarsiassaqartitsivik Ritzaus Bureau taama allaaserisaqarpoq.

Savalimmiuni umiarsuaatillit peqatigiiffiata paasissutissiinera naapertorlugu aalisariutit ukiup ingerlanerani ima pisaqamasimatigipput allaat 562 mio. koruunit nalinginik isertitsisimallutik. Ukiumullu siulianut kisitsit tamanna sanilliullugu 35 procentimik qaffariarneruvoq.

Taamatuttaaq kilisaatit 2005-imut sanilliullugu 32 procentimik qaffasinnerusumik isertitaqarsimasut unnersiutigineqarpoq, aatsaallugooq aamma kilisaatit taama pisaqartigipput.

Savalimmiuni aalisariutit 2006-imi pisaqamanerisa kinguneranik iluanaarutit katillutik 2,1 milliarder koruuniusimapput. 2005-imullu sanilliullugu 300 mio. koruuninik iluanaarnerusimapput, tassa procentinngoraanni 18 procentimik iluanaarut qaffariarsimavoq.

Savalimmiuni aalisariutaatillit peqatigiiffiisa oqarsimanerat naapertorlugu kilomut akip qaffariarsimanera pissutaalluni taama iluanaartigisoqarpoq.