Savalimmiormiut tusarnaartitsinissarsuarmut qilanaarput
Tuluup noqartilissorluni erinarsortartup Elton Johnip Tórshavnimi arsaattarfimmi tusarnaartitsinissaanut Savalimmiormiut 6.500-it tusarnaariassapput.
Elton Johnip anguteqatiminik inooqateqarnera ajoralugu upperisarsioqatigiit tusarnaariarinnginnissamut kajumissaarinerat soqutinagu Susanne Lydersen tusarnaariarnissaminut qilanaarpoq.
- Elton Johnip suiaassuseqatiminik atoqateqartarnera soqutiginngilara, nipilersortarnera nuannarigakku tusarnaariassavara, Susanne Lyddersen Torshavnimi aningaaserivimmi sulisoq oqarpoq.
Taassuma 13-inik ukioqarlunilu Elton Johnip nipuilersoriaasia nuannarilerpaa:
- Nipilersortagai amerlasuut nuannarivakka mannalu tikillugu uummammit pisumit Elton John nuannaraara.
Savalimmiormiut tusarnaariarnissaminnut qilanaarput pissangallutillu.
- Tusarnaartitsinissaq kikkut tamarmik oqaluuseraat, tusarnaariarnissamullu bilitsisimanngitsut pisinissaminnik eqqartuipput, ississutissanillu pisereersimasut piareersalereerput, Susanne Lydersen oqarpoq.
Tusarnaartitsinissamut aaqqissuussisut ilaat Dennis Holm oqaluttuarpoq, Savalimmiuni radioqarfiit marluusut Elton Johnip nipilersugaanik ulloq naallugu appisimaartut, aamma aviisit tusagassiorfiillu Elton John pillugu sammisaqartut, inuillu qiimmassimaaqisut, Dennis Holm oqarpoq. Nipilersortartup tusaamasap Savalimmiunut
tusarnaartitsiartornissaa qanoq ilillusi iluatsippisiuk?
- Kris Kristoffersen aamma Bryan Adams Savalimmiunut tusarnaartitsiartornikuupput, taakkua tusarnaartitsinerisigut tusaamasat allat Savalimmiunut tusarnaartitsiartornissaat ammanneqarpoq, soorlu Elton John tusarnaartitsinissaanut iluatsissimasoq, Dennis Holm oqarpoq.
- Nipilersortartut tusaamasat nunarsuarmi sumiiffinni amerlanerni tusarnaartitsisarput, maannakkullu nunarsuarmi sumiiffinni orninneqarpiarneq ajortuni, tusarnaartitsinissaminnut soqutinnilersimapput, maannalu tassa Savalimmiuni iluatsippoq, Dennis Holm oqarpoq.
