Savalimmiormiut timmisartuat ikuallammat inuit sisamat ajunaarput

Timmisartoq attartugaq Savalimmiormiut timmisartuutileqatigiiffianni Atlantic Airways-imeersoq Norgimi Bergenip eqqaani minnerliornermigut ajutoorpoq mittarfiullu avataanut pilluni. Timmisartoq minnerliornermi kingornagut ikuallalerpoq. Timmisartumi inuttat ilaat ataaseq ilaasullu pingasut ajunaarput.

Timmisartoq sarpeqanngitsoq sisamanik motoorilik

80-inik ilaasoqarsinnaasoq, Stavangerimiit Molde-mut ingerlaarnermini Stord-imut, Bergenip kujataaniittumut, akunnikkaluarpoq. Timmisartoq Molde-p avataani uuliasiorfimmi sulisunik angallassisussatut attartorneqarsimavoq.

Savalimmiormiut timmisartuat 16-inik ilaasoqarsimavoq, taakkunanngalu aqqaneq-marluk annaanneqarput.

Norgimi Bergenip kujataani Stord-ip mittarfeqarfiani annaassiniartut timmisartumi ajunaartut sisamat ullumi nassaarisimavaat. Ajutoorneq ullaaq nalunaaqutaq arfineq-pingasut qeqqata missaani pisimavoq.

Ualimut tusagassiortunik katersortitsinermi sooq timmisartoq mittarfiup 1330 meterisut takissusillip avataanut ingerlaannarsimanera politiinit oqaatigiumaneqanngilaq.

Timmisartup kigaallassaataasa ajoquteqarsinnaanerat oqaluuserineqarsimavoq, tassami Atlantic Airways-ip timmisartuutaa alla qanittukkut marloriarluni Bergenimut isumannaatsuunissaq pillugu mittariaqartarsimavoq, timmisartup kigaallassaataannik ajornartorsiuteqarluni.