Savalimmiormiut Skotlandimiunut unammillerput

Skotlandimiutut paarlagaalluni qitinnermi juunip qaammataani rekortiliisoqarpoq, qittannersuaq illoqarfimmi Bancorymi nalliuttorsiortoqarneranut atatillugu piviusunngortinneqarpoq. Tamanna Savalimmiormiunit unammillerneqalerpoq.
Allattoq Louise M. Kleemann
juulip 23-at 2010 09:10

Skotlandimiut ileqqorsuutitoqaat “Auld Lang Syne”qittannersuarmi atorneqarpoq, tamannalu Guiness Rekordimut nalunaarutigineqarluni.

Nutaarsiassaq Savalimmiunut anngummat illoqarfimmi Torshavnimi borgmesteri, Heðin Mortensen, unammillerniarluni aalajangertoq, Fótatraðk Newsimi allaaserineqarpoq.

Rekortiliisoqarneraniit ullut sisamat qaangiutiinnartut borgmesteri Guinessip allaffeqarfianut saaffiginnissuteqarpoq. Allakkamini Savalimmiormiut ileqqorsuutitoqaat Olai – ukiut tamaasa juulip 28-ani inuiattut nalliuttorsiornermut atatillugu qitinneqartartoq – nalunaarsoqquaa.

Savalimmiormiut ajornartorsiutitaqanngitsumik Skotlandimiunut ajugaasinnaasut qularinagu, borgmesteri oqarpoq.

Aamma savalimmiormiut 12.000-it missaat, tassa inuiaqatigiit 25 procentii, qittannersuarmi peqataanissaat borgmesterip naatsorsuutigaa.

- Savalimmiormiut rekortiliinissaat ukiorpassuarni atuukkumaartoq qularutiginngilara, borgmesteri Heðin Mortensen Fótatraðk Newsimut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq