Savalimmiormiut pingasoriaammik inuiaassuseqarnerupput

Savalimmiormiut Danmarkimi najugaqartut 64 procentii savalimmiormiuusutut misigisimapput, kalaallit Danmarkimi najugaqartut 22 procentii kalaaliusutut misigisimallutik.

Misissuineq  kalaallit Danmarkimut sooq nuuttarnerannut tunngavoq.

Missuisitsineq Folketingimi Atlantikup Avannaani Suleqatigiit missisuisitsinerannit nalunaarusiat pingasuusut aappaani tamanna takuneqarsinnaavoq.

Pissutsit taamaannerat nalunaarusiami nassuiarneqanngilaq, kisiannili qanoq sivisutigisumik Danmarkimi najugaqarsimaneq aamma nunami sorlermi peroriartorsimaneq apeqqutaasinnaasut  inuiaassutsimik misigisimanermut tunngassuteqarsinnaasoq.

Hans Petur i Brekkunum, Københavnimi savalimmiormiut illutaanni Det Færøske Husimi sulisuuvoq. Taassuma inuiaassutsimut sorlermut atasuunini qularutiginngilluinnarpaa.

- Savalimmiunut qaninneruvunga. Savalimmiormiuuvunga Danmarkimi najugaqartoq, Hans Petur i Brekkunum oqarpoq.

Petur Danmarkimi inunngorpoq Danmarkimi peroriartorluni, maannakkut 37-nik ukioqarpoq, ukiut 24-t savalimmiuni najugaqarluni.

- 20-nik ukioqarlunga Danmarkimut nuuppunga Savalimmiut qimakkusukkakkut, taamanikkut savalimmiormiut ilagerpiarneq ajorpakka. Ukiut arlaqartut qaangiummata savalimmiormiut savalimmiullu maqaasisalerpakka.  Maannakkut ikinngutikka amerlanerit savalimmiormiuupput. Kisianni Danmarkimiiginnarusuppunga, oqarpoq.

Misissuissitsinermi kalaallinit kingoqqisut kinguaariit tullii aperineqarput, kalaaliusutut imaluuniit qallunaajusutut misigisimanerunersut.

Aperineqartut pingajorarterutaasa missaanniittut kalaaliusutut qallunaajusutullu misigisimallutik oqarput. Taamatut misigisimasut ilaat tassaavoq, Pia Rosing Heilmann Københavnimi kalaallit illuutaanni ilinniagaqartunut siunnersorti:

- Kalaaliusutut qallunaajusutullu migisimavunga. Danmarkimiikkaangama Kalaallit Nunaat maqaasisarpara, Kalaallit Nunaaniikkaangamalu Danmarkiliarusuttarlunga.

Pia Rosing Heilmann  Danmarkimi ukiut sisamat kingulliit najugaqarpoq, anaanaa qallunaajuvoq ataataa kalaaliulluni. Akusaalluni aporfissaqalaartarpoq:

- Qallunaajusutut kalaaliusutulllu misigisimanaraluarluni, Danmarkimiitilluni takornartatut misigisimanartarpoq, takornartaanngikkaluarpungami,  oqaasii kulturiallu nalunnginnakkit, kisiannili paatsoornartoqartarpoq, Pia Rosing Heilmann naggasiivoq.

Misissuisitsinermi nalunaarusiat aappaat pingajuallu, folketingimi atlantikup avannaani suleqatigiit nittartagaanni dnag.dk-imi atuarneqarsinnaapput.