Savalimmiormiut nipilersornermik festivaliliortut

Nunatsinnit, Savalimmiunit, Islandimit Danmarkimiillu nipilersoqatigiit 25-init amerlanerusut tusarnaartitsissapput. Tusarnaartitsisussat tamakkerlugit tusarliunneqarsimanngillat, Nunatsinniilli Nanook aamma Rasmus Lyberth peqataanissaat inissinneqareersimavoq.

Festivalimik aaqqissuisut tassaapput Hans Petur í Brekkunum, Københavnimi Savalimmiormiut Illuutaannik aqutsisoq aamma Steintór Rasmussen, Savalimmiuni Aasaanerani festivalertitsisarnermik aallartitsisuusoq.

- Isumassarsiaq savalimmiormiut atlantikup avannaamiullu allat nipilersortartuinik nipilersortitsinissamik nerisassianillu alutornartunik sassaalliinissamik aammalu nunat avannarliit kultuuriinik sammisaqartitsinissamik aallaaveqarpoq, aaqqissuisut taama allapput.

- Nunanit avannarlermiut tuusintilippassuit aaqqissuussinermut ataatsimut katersornissaat siunertaraarput, festivalertullu - nipilersortunik tusarnaariarnerisa saniatigut - nunani avannarlerni ataatsimoorfigalugu kultoorerisamik nunallu akornanni ikinngutigiinnermik katersuuffeqarnissaat aamma siunertaraarput.

Frigg Festival atlantikup avannaamiut nipilersortartuinik Københavnimi saqqummilaartitsinissamik aaqqissuussinerit kisiartarinngilaat. Aammattaaq Songwriterfestivali ukiumoortumik ingerlanneqartartoq nunanik atlantikup avannaamiunik immikkut sammisaqarfiusarpoq, aammalu soorunami Grønland i Tivoli aggustimi ingerlanneqartarluni.

Frigg Festivalimi nipilersortussat allat ilaatigut tassaapput Fallulah Danmarkimeersoq, Týr aamma Hogni Savalimmiuneersut kiisalu islandimiut nipilersoqatigiit saqqummeqqammersut Kaleo.

Frigg Festival, maajip qulingiluaani qulinganilu ingerlanneqassaaq, nunani avannarlerni asanninnermut guuterineqartumut atsiunneqarsimalluni.