Savalimmiormiut misissuisitsinissamik piumasaqarput
Tassami Høgni Hoydalip tupaallaatiginngilaa, Danmarkimi naalakkersuisut nalunaarusiaani, ippassaq saqqummiunneqartumi, CIA-p Danmarkip, Savalimmiut nunattalu silaannartaatigut timmisartuussisarsimasinnaanera uppernarsarneqaranilu ilumuunnginnerarneqanngimmat. Tamannami kikkunnulluunniit attuumassuteqanngitsumik misissuisitsisoqarnissaa amerlanerussuteqartunit siorna itigartinneqarmat, folketingip oqaluttarfianiit ilimasaarutigereerpaa.
- Profetiusaanngikkaluarlunga taamanili ilimasaarutigereerpara, Danmarkimi naalakkersuisut misissuisitsinerat taama inerneqarumaartoq. Maannalu tamanna uppernarsarneqarpoq, Høgni Hoydal oqarpoq.
Taamaattumik kikkunnulluunniit attuumassuteqanngitsumik misissuisitsisoqarnissaa kissaatigaa.
- Tamanna Savalimmiut, Kalaallit Nunaata aamma Danmarkip inatsisit naapertorlugit innarlitsaalineqarnerannut pitsaasuussaaq. Kikkunnulluunniit attuumassuteqanngitsumik misissuisitsinikkut, inatsisitigut innarlitsaalineqartutut misigisimaneq nukittorsarneqassaaq – aamma nunat tamat akornanni, Høgni Hoydal naggasiivoq.