Savalimmiormiut isumalluarput
Nalunnermi nunarsuarmi pissartanngorniunneq Kinami ingerlanneqartoq ippassaq taamaatippoq, savalimmiormiorlu naluttartoq 20-iinnarnik ukiulik, Pál Joensen, 1500 meter-imik nalunnermi piukkunnerpaaffigisamini angusarissaaqaaq.
Naammassinissamut 200 meteriinnanngortoq Pál Joensen broncennattussatut inissisimagaluarpoq, meterinili kingullerni savalimmiormioq ungarnimiumit Gergo Kis-imit qaangerneqarpoq, savalimmiormiorlu nalullammak, nunani avannarlerni rekordiliilluni, aappaagulu Londonimi OL-imut peqataanissaminut anngulluni, sisamaalluni apuuppoq.
Pál Joensen Savalimmiuni najugaqarpoq nunatsinnilu naluttarfimmi Nuummiittumi Malittulli ittumi sungiusartarluni.
Taamaakkaluartoq naluttartoq 20-inik ukiulik nunarsuarmi nallorinnerpaat akornanni naluttarpoq, ukiorlu kingulleq EM-ertoqarnerani nalunnermi sølvinnalluni.
Londonimi 2012-imi OL-ertoqarnissaani, Pál Joensen, Danmark sinnerlugu unammeqataassaaq, Savalimmiummi Kalaallit Nunaattulli OL-ertoqarnerani nunani peqataasinnaasuni ilaanngimmat.
Ippassaq 1500 meterimik nalunnermi ajugaaniutivittoqarnerani Kinamiu Sun Yang ajugaavoq nunarsuarmilu rekordiliilluni.