Savalimmiormiut Island Gamesimi aaqqissuisuujumapput
Island Games 2011 pitsaanerusumik aaqqissuunneqarsimasinnaagaluarpoq. Timersoqatigiit kattuffiat unammersuarnerit sioqqullugit taama naliliivoq taamatullu naliliineq unammersuarnerit naammassimmata allanngortinneqanngilaq. Unamminissanut pilersaarutit piffissaq kingulleq allanngortinneqartarput pisariaqanngitsumik peqataasunut nalornisitsilersartumik.
Maanna savalimmiormiut 2019-mi aaqqissuisuuniarlutik suliniuteqalerput. Namminneq qularutiginngilaat suliaq pitsaanerusumik suliarisinnaallugu siunissami eqqaamaneqaatissaminnik, Savalimmiormiut timersoqatigiiffiisa kattuffianni siulittaasoq Petur Elias Petersen oqarpoq.
- Nunani avannarlerni periutsinut eqqaanartumik suleriaaseqarpugut taamalu tuluit periusaanniit allaanerusumik aaqqissuussisinnaalluta. Assersuutigalugu pisariaqartinneqassappat pilersaarutit allanngortissinnaavagut, Petur Elias Petersen KNR-imut oqarpoq.
- Aamma Island Games 1989-imi aaqqissuutereernikuuarput tamannalu suli ulloq manna tikillugu eqqaamaneqarpoq. Maanna suli pitsaanerusumik aaqqiissuussiniarluta pilersaarpugut, Petur Elias Petersen oqarpoq.
Tuluit qeratasumik periuseqarnerat Island Gameseqarnerani malunnarsivoq kalaallit angutit arsaattartut normu 9-nngorniuttussaagaluarnerat arajutsillugu kalaallit normu 11-nngorniutsinneqarmata tassanilu ajugaallutik. Aaqqissuisut allanngortitsiumannginnerisa tamanna kinguneraa.
Island Games maanna aaqqissuussaavoq annertooq peqataasut 3.000-nit amerlanerummata. Tamaammat Savalimmiormiut umiarsuarnik takornariartaatinik attartulersaarput ineqarfiusinnaasunik taakkulu saniatigut atuarfiit ineqarfittut atulersaarpaat.
- Torshavnimi byrådi aalajangereerpoq aaqqissuussinissatsinni aningaasatigut allatigullu ikiorniarluta. Naalakkersuisuni siulittaasoq aamma timersornermut naalakkersuisoq tamarmik piareersimanerarput timersornermut atortunik nutaanik sanaartornissamut ikiuutissallutik, Petur Elias Petersen oqarpoq.
Island Games pillugu suliniaqatigiiffik suli aalajaginngilaq Savalimmiut 2019-mi aaqqissuisutut toqqarneqassanersut. Savalimmiormiulli Sølvi Reinert Hansen Island Games pillugu suliniaqatigiiffimmi IGA-mi siulersuisuni ilaasortatut qinigaatippaat taamaasillutik suliniutsik pillugu siulersuisuni tapersersortissartik inissillugu.