Savalimmiormiut sullorsualiorlutik aqquserngiulersut
Ingerlatseqatigiiffiup pisortanit pigineqartup Eystur- og Sandoyartunlarip qeqertamit Streymoyimit qeqertanut Eysturoyimut Sandoyimullu sullorsuarnik marlunnik aqqusineqartussanik sanaartornissaq pillugu, Sverigemi suliffeqarfissuaq NCC marlunngormat isumaqatigiissuteqarfigaa.
Eysturoyimut sullorsualiassaq 11,2 kilometerinik isorartussuseqartussaq, Sandoyimullu sullorsualiassaq 10,5 kilometerinik isorartussuseqartussaq 2 milliardit koruunit missaannik naleqartussat, NCC-ip Norgemi immikkoortortaqarfianit sanaartorneqassapput.
Savalimmiuni sanaartornermik suliniutit anginersarissavaat.
Qeqertami Streymoyimi Torshavnimit Eysturoyimut avannarpasinnerusumiittumut sullorsualiassaq suliassaavoq immikkuullarissoq, immammi naqqata iluani nermallaliortoqartussaavoq.
Eysturoyimit sullorsualiorneq pilersaarutit malillugit decembarimi aallartinneqassaaq.
Sanaartorneqassappalli isumaqatigiissutigineqartoq Savalimmiuni naalakkersuisunit akuersissutigineqaqqaartussaavoq.
Sullorsualiat marluusut piviusunngortinneqassappata savalimmiormiut 50.000-it missaanniitut 90 procentii aqqusinertigut atassuseqassapput.
