Savalimmiormiut imernerulerput
Pisortat kisermaassillutik imigassaarniarfiat, Savalimmiormiut akornanni “Rusen”-imik taaneqartartoq, 1993-imili ammarnermi kingorna, 2007-imi aatsaat taamak tunisaqartigaaq.
Naatsorsuinerit ersersippaat, Savalimmiormiut 15-ileereersimasut siorna agguaqatigiissillugu 7,18 literimik imigassartorsimasut. Tamanna 2006-imut sanilliullugu 0,38 literimik qaffariarneruvoq.
Kisermaassilluni imigassaarniarfiup orninneqakulalernerata saniatigut, Savalimmiormiut imigassamik atueriaasiat aamma allannguuteqarsimavoq. Siornatigut imigassat sakkortuut, soorlu snapsi vodkalu pisiariumaneqarnerusaraluartut, maanna viinnit immiaaqqallu pisiariumaneqarnerulerput.
Taamaattorli naalagaaffeqatigiinneq isigalugu Savalimmiormiut imigassartukulasutut taaneqarsinnaanngillat. Assersuutigalugu 2005-imi kalaallit 15-ileereersimasut imigassaq 12,1 literi imerpaat, danskillu 11 literi imerlugu. Ukioq taanna Savalimmiormiut imigassaq 6,6 literi imerpaat.
