Savalimmiormiunngooq tassaapput inatsisinik unioqqutitsinnginnerpaat. Tuluit Nunaanni misissuisitsisarfiup, International Centre for Prison Studios-ip, Kings College-meersup, misissuisinerani erserpoq, savalimmiormiut nunarsuarmi tamarmi parnaarussaannginnersaasartut.
Savalimmiuni innuttaasut 100.000-iugaangata taakkunannga 15-it ullormut parnaarussaasarput. Nunarsuarlu tamakkerlugu tassa ikinnerpaapput.
Tassa Savalimmiuni pinerluttarneq annikitsuararsuuvoq. Soorlu Savalimmiuni ukiuni kingullerni 20-nngulersuni toqutsisoqarsimanngilaq.
Toqutsineq kingulleq 1988-imi pivoq.
Savalimmiuni politiit pisortaanerata tullersortaa, Finn Ougaard, nutaarsiassaqartitsivimmut Ritzauimut oqarpoq, kisitsisit taama appasitsiginerat tupaallaatiginngikkini.
- Inuiaqatigiiuvugut ikittunnguit ataqatigiilluartullu. Tamatuma nassataraa, immitsinnut aqulluarsinnaanerput, politiit pisortaanerata tullersortaa oqarpoq, aamma nalilerlugu, savalimmiormiut imminnut ataqqeqatigiinnerisa pinerlunniartarneq minnerpaaffianiitikkaa.
Parnaarussaasartut nunarsuaq tamakkerlugu amerlassusaat eqqarsaatigalugu Kalaallit Nunaat normu 56-iuvoq. USA-mi parnaarussaasartut amerlanersaapput, tulliuvorlu Rusland.