Savalimmiormiut ileqqaartalissapput

Savalimmiormiut utoqqalinersiassaminnut namminneq aappaagu ukiortaamiit ileqqaartalertariaqalersinnaassapput.

Taama siunnersuut aningaasaqarnermut Savalimmiuni naalakkersuisup, Bardur Nielsenip, tusarniaavigineqartussatut eqqarsaatigalugu, nassiuteqqammerpaa. Siunnersuummi allaqqavoq, savalimmiormiut akissarsiallit isertitamik 15 procentii ukiuni tulliuttuni qulini ileqqaartalissagaat, taamaalillutik ileqqaagaat erniaqarluartassammata. Sulisitsisut sulisuminnut aamma taakku procentit assipajaavanik tapersiisarnissaat takorloorneqarpoq.

Naalakkersuisut pilersaarutaat naapertorlugit ileqqaakkat utoqqalinersianut tapiissutaassapput. Savalimmiormiut aamma namminneq pensiuunissaminnut aaqqissuussisinnaassapput.

Utoqqalinersiutinik ileqqaartarnissamut siunnersuut aningaaserivinnut, sillimmasiisarfinnut katuffinnullu nassiussuuneqareerpoq. Naalakkersuisulli, Bardur Nielsenip, qularinnginnerarpaa, siunnersuut kattuffinniit akuersaarneqarpiarnavianngitsoq.

Savalimmiormiut ukiut arlaqanngitsut qaangiuppata utoqqalinersiuteqalersussat amerleriartussaapput, soorlu Europami nunani allani aamma taamaattoq. Ukiut 30-t qaanguppata savalimmiormiut 10.000-t 15.000-llu akornanniittut soraarninngorsimassasut ilimagineqarpoq, maannamut naleqqiullugu marloriaatinngorsimassallutik.