Savalimmiormiut Danmarkimut nunasivittartut amerligaluttuinnarput

Savalimmiormiut inuusuttai Danmarkimut ilinniariartut 60 procentiupput. Ilarpassuisa uteqqinneq ajornerat ilaqutaqalersimanermik atorfeqalersimanermillu peqquteqarpoq.

Savalimmiormiut 7.700-t 20-t 45-llu akornanni ukiullit Danmarkimi ullumikkut najugaqartut misissuinermi peqataapput. Tamarmik Savalimmiuni 48.000-inik inoqartumi inunngorsimasuupput.

- Ilinniarluarsimasut inunngorfimminnik tunutsisarnerat ajornartorsiuterujussuuvoq. Inuiaqatigiit iluanni aningaasaqarneq, kulturi ulluinnarnilu inuuneq imaannaanngitsumik annaasaqarfiupput, Lagtingimi politikeri, Republikanerit sinnerlugit Folketingimi taartaalluni issiagallarsimasoq taama oqaproq.

Savalimmiuni arnat ikiliartuinnarnerat aamma malunnarluarpoq, pingaartumik arnat meeqqiorsinnaasut amigaataalersimapput, ukioqatigiikkuutaat 20-niit 24-nut ukiullit akornanni arnat angutinit 13 procentimik ikinnerulersimapput.

Savalimmiormiut avalannerit isumaqarput Savalimmiuni inuuneq qangarnisarpalaarpallaalersoq unittoorsimallunilu.

Assersuutissaqqippoq, arnaqatigiit anguteqatigiillu katissinnaatitaanerannik apeqqut.

Savalimmiuni nunaqavissut akerliupput, avalannerilli 67 procentiisa Savalimmiuni suiaassuteqatigiit katissinnaalersikkusuppaat.