Savalimmiormiut atugassaarnerulernissartik kissaatigaat

Qineqqusaarnermi ukiortaamili aallartittumi – inuiaqatigiit atugarissaarnerulernissaat sammineqartorujussuusimasoq – Savalimmiuni TV-kkut aallakaatitassiornermi pisortaq – Øssur Winthereig oqarpoq.

- Qineqqusaarutigineqartorujussuit pingaartut aamma ilagaat, meeqqat atuarfiat ilinniaqqittarnerillu. Ajornartorsiutaasorujuussuuvoq Savalimmiormiut kalaallit pisarnerattulli Danmarkimukarlutik ilinniariartorsimasut uteqqittannginnerat.

Ajornartorsiut ima atsigilersimavoq, allaat savalimmiuni politikerit immikkut iliorluni inuusuttut Savalimmiunut uteqqinnissaannik suliniuteqaqqusilerlutik, Øssur Winthereig oqarpoq.

Qineqqusaarnermili namminersorneq suli sammineqarpianngilaq. Republikanerit oqaraluarput qineqqusaarnermi sammisani namminersorneq pingaarnerpaasoq, kisianni partiit allat qinersisitik assigiinngitsunik isumaqartitermata oqallinnermi tunuarsimaarput.

Savalimmiuni maannamut qinersiviit arfineq-marluusimapput. Arfininngorpalli qinersinermi qinersivik ataasiinnaassaaq. Qinersiviup ataaserujussuanngortinnera illoqarfinni annerni qineqqusaartut taaguunneqarnerunissaanik ernumatitsilerpoq, allaat qeqertani minnernit qineqqusaartut inatsisartuni aallartitaarunnissaat arlalinnit ilimagineqalerluni.

Øssur Winthereigip ilimaginngilaa arfininngorpat tulliani qinersineq ullumikkumit allaanerusumik inissisimasoqalerneranik kinguneqassasoq.

- Eqqaamaneqartariaqarpormi Savalimmiut nunaammata avannarpiaanit kujaterpiaanut 100 kilometeriinnarnik isorartussusillit. Qineqqusaartut qineqqusaarluarnerat taasinerit qanoq innissaanut apeqqutaalluinnassaaq, suminngaanneersuunerat apeqqutaanani, TV-qarfimmi pisortaq oqarpoq.

Partiit pingasut ullumikkut naalakkersuisuutitaqartut ingerlaannarnissaat ilimagaa. Kinali naalakkersuisunut siulittaasunngussanersoq pissanngatigineqarpoq.

Partiit arlalinnik piukkussaqarput, Socialdemokratillu ullumikkut siuttoraat Jóannes Eidesgaard.