Savalimmiormiut amerlanersaat pualavallaarujussuarput
Inuiaat peqqissusaannik misissuinermi nutaami tamanna erserpoq, tassani takuneqarsinnaavoq savalimmiormiut 60 procentii pualavallaartut. Taakkunannga 17 procentit pualavallaarujussuarput, Savalimmiunilu innuttaasut pingajorarterutaat kisimik nalinginnaasumik oqimaassuseqarput.
Nerisaqarneq pillugu siunnersorti, Anita Højgaard, Savalimmiuni napparsimmavimmersoq, Savalimmiut Radioannut oqarpoq, savalimmiormiut assersuutigalugu danskiniit oqimaannerunerannut pissutaagunartoq Savalimmiuni sila aamma pinngortitaq.
Savalimmiormiut aalavallaartorsuunngillat, tamatumunnga pissutaagunarpoq Savalimmiuni silassaq atuarneqaraangat imaannerusarmat, sialuk anorilu, tassa amerlanerit isersimaannarusunnerusarput.
Peqqissutsimik misissuinerup aamma ersersippaa, Savalimmiuni nunaqarfinni najugallit illoqarfinni najugalinniit oqimaannerujussuusartut. Nunarsuatsinnilu allatuulli takuneqarsinnaavoq ilinniagartuujunngitsut ilinniagartuunut sanilliullugit pualavallaarnerusartut.
