Savalimmiormiut aalisaqqilerput
Suliumajunnaarnermut, koruunik millionerpassuarnik ullormut annaasaqarfiusumut, pissutaavoq, Savalimmiuni aalisartut kattuffiata aalisariutaatillillu akornanni isumaqatigiissut nutaaq.
Illuatungeriit isumaqatigiissitsiniartartut aqqutigalugit nutaamik isumaqatigiissusiornissaq ippassaq unnukkut isumaqatigiissutigaat, aalisartut taamaalillutik annertunerusumik ilaatigut soraarnerussutisiassaqalerlutik.
Akerleriissutaasimavoq aalisartut uuliamut akitsoriartupilooqisumut ilumut akiliiuasanersut. Apeqqut taanna suli isumaqatigiissutigineqanngilaq, illuatungeriilli upernaaru isumaqatigiinniaqqissapput.
Suliumajunnaarnerup januaarimi pinera assut ajornartorsiortitsivoq, aalisarnermi januaarimi pitsaanerpaasarpoq, aalisakkat qaammammi tassani akigissaartorujussuusarmata.
Aalisarneq Savalimmiuni inuussutissarsiutit pingaarnersaraat. Suliumajunnaarneq aningaasarpassuarnik annaasaqarfiuinnanngilaq, nerpiiaaneq aamma uninngasariaqarsimavoq, suliassaqarsimanngillammi.
