Savalimmiormiut aalisagartassatik ikilisinniarpaat

Savalimmiuni naalakkersuisut aalisagartassiissutit maanna ikilisingaatsiarnialerpaat. Taamaalilluni naalakkersuisut ilaatigut Savalimmiuni immamik misissuisoqarfiup innersuussutai malinnialerpaat, taakkumi oqaatigimmassuk, saarulliit ima ikilisimatigisut, allaat Savalimmiut imartaanni saarulleerussinnaanera aarleqqutigineqarluni.

Taamaattumik aalisarnermut naalakkersuisoq – Torbjørn Jacobsen Republikanerineersoq – inatsisartunut siunnersuuteqarpoq, aalisariutinut assigiinngitsunut ”ullut aalisarfiusunik” taaneqartartut ikiliserujussuarneqassasut. Tassa aatsaat taamak annertutigisumik aalisarneq minnerulersinniarneqarpoq, naak immikkut ilisimasallit aalisagartassiissutigineqartartut amerlavallaarnerarlugit qangali mianersoqqussutigisaraluaraat.

- Kisianni aalisarnerput ullumikkutut ingerlatiinnarutsigu, siunissami imartatsinni saarulleerullunilu saarulliusaarutissaaq, naalakkersuisunut ilaasortaq inatsisissatut siunnersuummini ilaatigut taama tunngavilersuivoq. Siunnersuut naapertorlugu aalisariutit ullut aalisariarfigisinnaasaat 50 procentimik ikileriartinneqarniarput.

Siunnersuut sakkortuumik akerliuffigineqarpoq.

- Umiarsuit arlallit aalisarunnaartariaqassapput. Siunnersuut annilaarnaqaaq, Savalimmiuni aalisariutaatillit peqatigiiffiannit ilaatigut taama oqaaseqartoqarpoq.