Savalimmiormioq naluttartutut tusaamasanngorpoq
1.500 meterimut nalunnermi Pál Joensen sølvinnannermigut, Europamiut inersimasut nalunnermi pissartanngorniunneranni Savalimmiormiuni siullerpaalluni medaaliannappoq.
Taanna taamaalilluni Londonimi 2012-imi OL-eqalerpat peqataanissaminut periarfissaqarlualerpoq, taamaattorli Savalimmiut Nunarput assigalugu Nunat tamalaat OL-imut ataatsimiititaliaanut ilaasortaanngimmat, Pál Joensen 2012-imi OL-imi peqataaniaruni, Danmarki sinnerlugu peqataasariaqassaaq.
- Danmarki sinnerlugu nalunnermi unammeqataassaguma misigissutsikkut nalorninartorsiussaanga. Savalimmiut sinnerlugit peqataanissara kissaatiginerugaluarpara, kisianni OL sioqqullugu Danmarkimit peqataasussat sungiusaqatigissavakka, Pál Joensen aviisip Politikenip nittartagaanut oqarpoq.
Danmarkimi nalunnermi nunanut allanut unammisartut sungiusaasuat Lars Sørensen oqarpoq, Pál Joensen Danmarkip nunanut allanut unammisartuinut sungiusaqataaqqullugu arlaleriarluni kajumissaartarsimagaluarlugu, tamannali Pál Joensenip sungiusaasuata itigartittarsimagaa.
- Kissaatiginngippagu Danmarkip nunanut allanut unammisartuinut peqataaqqullugu pinngitsaaliniarsinnaanngilarput, Lars Sørensen erseqqissaavoq, taamaattorli Savalimmiormiu nallorissorsuaq taanna Danmarkip nalunnermi nunanut allanut unammisartuini ilaasinnaalernissaa neriuutigigini.
