Savalimiormiut naartuersinnermut akuersaarnerulerput
Gallupip isumasiuisitsineratigut erserpoq, Savalimmiormiut 51 procentiisa naartuersissinnaanermut inatsiseqalernissaa isumaqatigigaat. Ukiut arfiniliinnaat matuma siornagut taamatut isumaqartut 28 procentiinnaagaluarput.
Savalimmiuni Universitetimi kulturikkut ilisimatusarnermi ilisimatooq Edoun Andreasen isumaqarpoq, Savalimmiormiunut naartuersittarnermik isuma takornartaajunnaarsimasoq, taamalu isummaminnik allanngortitsillutik.
- Naartuersittarneq pillugu oqallinneq ukiuni kingullerpaani aatsaat ingerlanneqalerpoq. Tamatuma kinguneranik isuma Savalimmiormiunut takornartaajunnaarpoq. Aamma pissutaasinnasutut taaneqarpoq, ilaqutariit ilaanni arnat inuusuttut naartuersinneq misilereersimammassuk, Edoun Andreasen Kristeligt Dagbladimut oqarpoq.
Savalimmiut tassaavoq Nunani Avannarlerni naartuersiffiunnginnerpaasartoq, ukiumummi 45-t missaat naartuersittarput. Arnat naartuersinnissamut akuerisaasartut tassaapput, pinngitsaalisaallutik arneriffigineqarsimasut, peqqinnissakkut ulorianartorsiortinneqartut imaluunniit naartoq nappaammit ulorianartorsiortinneqarpat.
Nunatsinni ukiuni kingullerni naartuersittartut amerliartuinnarput. 2006-imi 867-inik maani naartuersittoqarpoq.
