Savaatillit paatsoorsimassapput

Kujataani savaateqarfiit ilaasa, nunarsuarmi kinguaat kulturikkut kingornutassaattut eriagisassatut UNESCO-mit siunnersuutigineqarnera, savaatilinnit akerlilerneqarpoq. Taamatut akerliliineq paatsoornerusimassasoq, Narsami katersugaasiviup pisortaa Rie Oldenburg oqarpoq.

- Savaatillit eqqunngitsumik paasissutissiiffigineqarsimanissaat ilimagaara, aamma immaqa Ilulissani nunamik eqqissisimatitsilersimanermut assingusorineqarpoq. Kisianni taamaattoqannginnami. Savaatillit ernumanerat paasisinnaavara, nunamimmi eqqissisimatitsisoqaraangat savaatillit eqqornerlugaasarmata. Kisianniuna maannakkut pisoq tassaasoq kulturikkut nunarsuarmi kinguaat kingornutassaattut eriagisassatut UNESCO-mit siunnersuuteqartoqarnera, Rie Oldenburg oqarpoq nangillunilu: - Savaatillit eqqunngitsumik paasitinneqarsimassapput, qujanartumimmi pisoq tassaavoq UNESCO-mit siunnersuutigineqarneq, taannalu atorluarneqarsinnaavoq, ilaatigut takornariaqarnermut tunngasunik suliniarnernut atorluarlugu. Ilulissani pisimasoq tassavoq nunarsuarmi kinguaat kingornutassattut eriagisassatut nunamik eqqissisimatitsilerneq, kulturikkullu eriaginninnissamut assersuunneqarsinnaanani. Taamaammat isumaqarpunga kujataani savaatillit taamatut siunnersuutigineqarnertik atorluartariaqaraat., Rie Oldenburg oqarpoq.

Nunarsuarmi nunat eriagisassatut kulturikkulluunniit eriagisassatut UNESCO-mit innersuunneqartartut takornarianit ornigarneqarnerusarput, taamaammallu kujataani takornarianik sullissinermi siuarsaanissaq Rie Oldenburg-ip takorloorpaa, ilaatigut savaatilinni nerisaqartitsiitigaluni takornarianik unnuisitsisarneq neqeroorutinngortinneqarsinnaasoq.

Narsami katersugaasivimmi pisortaq Rie Oldenburg aamma oqarpoq kujataani savaatillit ukiorpassuarni savaateqarsimanerat UNESCO-mit nersorniarneqartoq.