Savaatillit naatsiaataannik Brugsen pisisalerpoq

Kalaallit tunisassiaannik Brugsen pisinissaminut soqutiginnittorujussuuvoq, taamaattumillu Kujataani savaatilinniit naatsiianik 50 tonsinik pisiniarluni.

Savaatillit Brugsenillu pisinissamik isumaqatigiissutissaat piareerpoq atsiorneqarnissaalu kisimi amigaataalluni.

- Isumaqarpugut kalaallit naatsiiaat seqqitsagaannginnamik pitsaanerpaasut, Brugsenimi pisiortornermut pisortaq Finn Christensen oqarpoq.

Taassumali pisinissamut isumaqatigiissut Radioaviisimut oqaatigerusunngilaa, oqaatigaluguli naatsiiat naleqquttumik akilerlugit pisisartunut tuniniarneqarumaartut.

Sermitsiami ullumikkut saqqummersumi allaaserineqarpoq savaatillit KNI tunukkaat taarsiullugulu Brugsenimut isumaqatigiissuteqartut.

- Neqeroorfigineqarsimagaluarpugut siornatigut naatsiiaatitsinnut akiliutigineqartartup affaannaanik. Pilersuisup neqeroorutaa akuerisimasuugutsigu attassinnaasimanavianngikkaluarparput, savaatillit naatsiiat pillugit isumaqatigiinniartitaat Otto Nielsen Sermitsiamut taama oqarpoq.