Savaatillit attartortitsinermi akigititaat tunuartinneqalerput
Traktoorinik allanillu atortunik attartortitsinermi Savaatillit Peqatigiit Suleqatigiissut, SPS-p akigititai tunuartiinnartariaqalerput Unammilleqatigiinnermut Ataatsimiititaliami aalajangerneq naapertorlugu.
Atortunik taamatut attartortitsilluni akeqartitsineq, Unammilleqatigiinnermut Ataatsimiititaliamit isumaqatigineqanngilaq, tamanna unammilleqatigiinnnermut inatsimmi paragraf 11-imi aalajangiussat naapertorlugu akuerineqarsinnaanngimmat.
Illuatungeriit – SPS aamma Unammileqatigiinnermut Ataatsimiititaliaq maajip 14-ianni Qaqortumi ataatsimiinnerminni akigitinneqartut allattorsimaffiat atorunnaarsinneqassasoq isumaqatigiissutigaat.
Atortunik attartortitsinermi akigitinniarneqarsimagaluartut aqqusinniornermi aqqusinernillu aserfallatsaaliuinermi najoqqutassatut SPS-imit siorna pilersinneqarput.
Kujataani kommuneqarfiit savaateqarfiusut, kiisalu Namminersornerullutik Oqartussat maanna Unammilleqatigiinnermut Ataatsimiititaliamit inanneqarput siunissami aqqusinniortoqassatillugu tamanut ammasumik suliariumannittussarsiuussinikkut nittarsaasoqartassasoq.
