Savaatillit Arnartaasa Peqatigiiffiat 30-t missaannik peqataaffigineqartumik, Qaqortumi ukiumoortumik ippassaq unnukkut ataatsimeersuarpoq.
Pingaarnertut oqaluuserineqartut ilagaat, siulersuisunngortunut nutaanut suliakkiutigineqassasoq, savat meqquinik qissiat akiisa aalajangersarneqarnissaasa suliarineqarnissaat, ullutsinni qissisup nammineq aalajangertarmagu qanoq akeqartitsitsissanerluni.
Suliakkiutigineqartut aamma ilagaat, tarnip pissusaanik ilisimasalimmit pikkorissartinneqarnissaq. Inuilaami ilaatigut ukiup ilarujussua kisimiilluni inuuneq pingaartumut nuliaasumut oqitsuinnaasanngimmat. Taakku saniatigut savaatillit arnartaasa nunanut allanut angalaqatigiinnissaat aqqutissiuunniarlugu, peqataasut angerlarunik sumut sunalu siunertaralugu angalanissamut kissaateqarnerlutik siulersuisunut ingerlateqqissagaat isumaqatigiissutigineqarpoq.
Savaatillit Arnartaasa Peqatigiiffiani ilaasortat aqagu arfininngornermi Puilasumi suliaminnik saqqummersitsissapput.
Savaatillillu Peqatigiit Suleqatigiissut, Qaqortumi ataatsimeersuarnertik ullumi tallimanngornermi aallartippaat, tassanilu oqaluuserisassanut ilaalluni savaatillit ullormik aalajangersimasumik tuniniaaffeqartalernissaat.
