Savaatillit Arnartaasa Peqatigiiffiat ataatsimeersuarpoq

Nanortalimmi Savaateqarnerup inuussutissarsiutitut ukiuni 100-liilluni nalliuttorsiorneranut atatillugu Savaatillit Arnartaasa Peqatigiiffiat kulturikkut illumi, Qujanartip illuani, ippassaq unnukkut ataatsimeersuarput, arnat 30-t missaanniittut peqataaffigisaannik. Ataatsimeersuarnermi suleqatigiinnerulernissaq pingaarnertut siunniunneqarpoq.

Arnat avinngarusimasuniittut peqatigiiffilerinermi kisimiippallaartutut misigisimasarput, soorlu savaateqarfinni avannarlerneersut kujasinnerusuneersuniittunut sanilliullutik saaffissaaleqinerusarnerat ilisimaneqartoq.

-Arnat suleqatigiinnerulerutta angutitatsinnut tapersersuinerput nukittornissaa aamma anguneqarsinnaavoq, Savaatillit Arnartaasa Peqatigiiffianni qinersinertaqanngitsumik siulittaasunngoqqittoq Inge Nielsen Kujataata Radioanut oqarpoq.

Savaateqarnerup inuussutissarsiutitut ukiut 100-t ingerlanerani, arnat illumi suliassat piinnarunnaarlugit angutit suliaannut akuunerulersimapput. Assassortarnertilli tusaamasaassutigaat. Tapersersoqatigiinneq anguniarlugu Savaatillit arnartaasa kusanartuliaannut tunngatillugu kajumissaasiisarnissaq ataatsimeersuarnermi isumaqatigiissutigineqarpoq, tamannalu aqagu arfininngorpat siullermeerluni ingerlanneqassaaq.

Savaatillit Arnartaasa Peqatigiiffiata siulersuisui tallimanik ilaasortaqarpoq, marlunillu sinniisussaqarluni.