Savaatilinnut aningaasat millionerpassuit
Kummune Kujallermit nalunaarutigineqarpoq, Finn Karlsenip oqalugiarnermini nalunaarutigigaa, 2015-imut Aningaasanut Inatsit, Inatsisartut ukiaanerani katersuunneranni Naalakkersuisunit oqaluuserisassanngortinneqarmat.
Tamannalu savaatilinnit nuannaarutigineqaqaluni ataatsimiinnermi isumaqatigiissutigineqarpoq, Neqi A/S-ip nutarterneqarnera kinguneqarluassappat, aningaasat neriorsuutaasut ilaat atorlugit nunalerinermi atugassarititaasut ineriartortinneqassasut, soorlu naatsiiveqarneq, erngup seqerngullu nukingisa atorluarneqarnerunissaat kiisalu uumasut inaasa nutarterneqarsinerisigut nutaanillu sanaartornikkut nioqqutissiorneq nukittorsarneqartariaqartut.
Taakku kissaataasut saniatigut allat kissaatigineqartut tassaapput, Royal Arctic Linep kisermaassinera avaqqullugu, tassa aqqutit allat atorlugit, savaatillit ukiumut ataasiarlutik naggorissaatinik, maskinanik, traktorinik sanaartornermullu atortussanik tikisitsisalernissaat periarfissiuunneqassasoq.
2015-imut Aningaasanut Inatsimmi 20 million koruunit aalisariutit nutarterneqarnissaannut, sinerissamut qanittumi aalisarnerup ineriartortinneqarneranut pilersaarummut, misiliilluni aalisarnernut allanullu atorneqartussatut immikkoortinneqaraluarput. Tassalu taakku ilaat 15 million koruunit Kujataani savaatilinnut atugassanngortinneqarnissaat, Inatsisartut ukiamut ataatsimiinneranni Naalakkersuisut siunnersuutigilersaarpaat.
Kommune Kujallermi inuussutissarsiutinik ineriartortitsinermut pisortaata, Kenneth Høeghip neriuutigaa, aningaasat tapiissutigineqartussat savaatilinnit pitsaasumik iluaqutaasussamillu agguataarneqarumaartut.
- Aningaasat million koruunerpassuit tamanut iluaqutaallutik siaruarterneqarnissaat oqimaaqatigiissaarluarneqartussaassaaq. Suliffissanik pilersitsinissaq pingaaruteqarpoq, tamannalu anguneqassappat aningaasat pitsaasumik aqunneqartariaqarput, Kenneth Høegh KNR-imut oqarpoq.
Kujataani savaatillit Aningaasanut Inatsimmit pissarsitinneqarnissaannik siunnersuuteqarnermut, Nunalerinermut Naalakkersuisoq, Finn Karlsen oqaaseqartinniaraluaratsigut ullumikkut iluatsinngilarput.
