Savaaqqap neqaa akisunerulerpoq

Savaaqqat neqaat Neqi A/S-imut tunineranni akisunerulerput. Tamanna ilaatigut savaatillit naggorissaatissanut aningaasartuutigisartagaasa ukiup ataatsip ingerlanerinnaani 65 procentimik qaffariarsimaneranik pissuteqarpoq. Savaatillit Peqatigiit Suleqatigiissut, SPS-ip, siulittaasua Niels Lund, aviisimut Sermitsiamut taama oqarpoq.
Allattoq Louise M. Kleemann
septembarip 12-at 2008 06:39

Savaaqqat 22.000-t tungaanut amerlatigisut qanittukkut toqorarneqalissapput, taakkulu Neqimut tunineqarneranni savaatillit kiilumut 39 koruunit missaannik pissarsissutigissavaat.

SPS-ip akinik isumaqatigiinniartartui Narsami toqoraavimmut Neqi A/S-imut sapaatip-akunnera kingulleq isumaqatiginninniarput, tassanilu savaaqqap neqaata akiata kiilumut 3,55 koruunimik qaffannissaa anguneqarpoq.

- Akit suli pitsaanerulernissat neriuutigisimagaluarparput, aamma aasaq manna nuna panertorujussuummat, savaaqqat qanoq neqeqartiginerisa naatsorsoruminaassimanerat pillugu, Niels Lund oqarpoq.

Atuisartut akit qaffaataat tamaat akilertassavaat kisianni isumaqatigiissut neqileriffiup ingerlatsinermut aningaasartuutaanut sunniuteqassanngitsoq Neqip pisortaa Lars Møller-Sørensen ilisimatitsivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq