Narsami Neqi A/S-mi savaaqqanik savanillu ataasinngorpat, toqoraasoqalissaaq.
Neqi A/S-mi tunisassiornermik pisortaq Henning Sønderup neriulluaqisoq oqarpoq, Royal Greenland-ip raajaleriffikuani sulisuusimasut, ataasinngorpat Neqi-mi sulilernissaminnut piareertut.
-Sulisussavut aatsaat taamak piareersimalluartigipput, qaammatini kingullermi aqqusaarsimasaat pitsaalluinnarmata, Henning Sønderup oqarpoq.
Tassani inuit 50-it pineqarput, taakkualu qaammatini kingullerni Inuussutissalerinermi Ilinniarfimmi, Inuili-mi, pikkorissartinneqarput. Ilaatigut aqqusaarpaat eqqiluisaarneq aammalu savaaqqat savallu neqaanik nutaanik tunisassiorneq taakkualu qanoq nerisassiarineqarnissaat ilanngullugit.
Savaaqqat 22.000-it sinneqalaartut savallu 1400-nik amerlanerit toqutassat, savaateqarfinnit 53-nit toqoraaviliaanneqartussapput.
- Pilersaarutigaarput ullormut savaaqqat 600-t Narsamut assartorneqartassasut, kisianni uninngasuutit katillugit 1200-sassapput. Neriulluarpunga sulisut malinnaalluarnissannut, taama oqarpoq Niels Lund, Savaatillit Peqatigiit Suleqatigiissut siulittaasuat.